RG Stadium leh a chhehvel ram Home-in SYS dept. hnenah an hlan

Mualpui, Aizawla Rajiv Gandhi Stadium leh a chhehvel ram chu nimin khan Home minister K Sapdanga pisaah Home department-in Sports & Youth Services (SYS) department hnenah an hlan.

Ram inhlanna atan hian lehkha siam a ni a, Home secretary Vanlalmawia leh SYS secretary V Lalsangliana ten hming an ziak a; Home Minister-in Sports minister Lalnghinglova Hmar hnenah a hlan a ni.

RG Stadium awmna leh a chhehvel ram hi Home department ram niin, 3rd Battalion MAP hmun a ni a, kum 2010 khan RG Stadium siam ṭan a ni. A hmunhma enkawl chu Sports department kutah awm mah se, a ram chu Home department ta a la ni zui zel a; nimin khan Sports department hnenah Home department chuan an hlan ta a ni.

Ram inhlan a nih tâk avang hian Rajiv Gandhi Stadium awmna leh a chhehvel ram hmun ṭhenkhat Home Secretary hminga awm mek chu SYS department hmingin dah a ni tawh ang.

Home minister K Sapdanga chuan, Mizoram Police hmun pawimawh leh ui em em chu ṭhalaite tan leh infiamna hmasawn zelna atan SYS department hnenah hlan a nih thu sawiin, "Neitu nihna thinlung nen ṭangkai lehzuala in hman ngei ka beisei," a ti. A thawhpuite'n vawi eng emaw zat an sawiho hnuah Home department ram hlu tak chu ram tana ṭangkai tur zawka an rin avangin SYS department hnenah hlan a nih thu a sawi.

Sports minister Lalnghinglova Hmar pawhin thu sawiin, Home department-in phal taka SYS hnena ram an hlan chu an lawm tak zet thu a sawi a, "Sorkarin sports kalpui duh dan mumal tak a nei a, sports-ah sum leh hun kan sêng hnem chungin ram pum huap intihsiaknaah kan la hniam em em. RG Stadium leh a chhehvel hmunhmate hi sports hmunpuiah siam a, training-na hmunhma leh Centre of Excellence-a siam tumin ruahmanna kan nei a ni," a ti.