Khuarel chhiatnaa inhmakhua turin ngen

ZPM party chuan, khuarel chhiatna nasa zawk leh nunna chàn a nih loh nan fimkhur tur leh inhmakhua turin mipui an chah a, chhiatna thleng theiah inhmakhua turin sorkar an ngen bawk.

ZPM chuan thuchhuah siamin, fûrpui a thleng leh dawn tawh a, fûr laiin kum tin chhiatna hrang hrang a thleng ṭhin tih an tarkang a, "Khuarel chhiatna hi pumpelh theih ni lo mah se, chhiatna nasa zawk leh nunna hlu tak kan hloh loh nan mipuite theihtawpa fimkhur tur leh inhmakhua turin kan chah a ni," an ti.

Sorkar department hrang hrangte chu hmasawnna hna thawhnaah harsatna leh chhiatna thleng theite ngaihtuah chhunga hma la turin ZPM chuan an ngen a, "Disaster Management & Rehabilitation Department pawh theihtawpa inhmakhua turin kan ngen," an ti a; khuarel chhiatna a thlen chánga rang taka sorkar hmalakna ṭawiawm ṭhin NGO-te chungah an lawm thu an sawi rualin, sorkar hmalakna ṭawiawm zel turin an ngen.

ZPM PARTY THUCHAH LEH NGENNA

* Aizawl tui lakna Tlawng lui a hnar lamah leivûng paih an awm ṭhin avangin fûr laiin pump hleih theih loh khawpin a nu ṭhin a, Tlawng hnâr lamah leivûng paih lo turin mipui an chah.

* State Meteorological Centre-in khawchin (weather forcast) a tarlan ṭhinte bengkhawn ṭhin turin mipui an chah.

* Ṭul leh pawimawh tak takah lo chuan zin veivâk tam lo turin mipui an chah.

* Mahni in leh a chhehvel tui luankawr leh tuichhe paihnate enfiah te, thlipui laka him nan in leh lo thawm ṭhat ngaite ngaihven a ṭul thu an tarlang.

* In leh lo din tum mekte chu lei laih hun a ni lo tih hria a, ṭhenawm khawveng tana mangkháwng siam lo turin an ngen.

* Khuarel chhiatna karah fimkhur tâwk loh vanga chhiatna nasa zawk thleng thei a awm avangin, leimin tur vên kawngah leh harsatna thleng theite ngaihtuah chunga hma la turin khawtlang hruaitute leh chhung tin an chah.