PwD Commissioner-in Lawngtlai a endik

Mizoram Persons with Disabilities (PwD) commissioner Vanlaldiki Sailo chuan nimin khan Lawngtlai khawpuia sorkar pisa, zirna-in leh damdawi-inte a tlawh a; rualbanlote thlen phakna leh awlsam zawka rualbanlote tana dâwr theih an nih leh nih loh a enfiah.

Vanlaldiki Sailo chuan, Accessibility India Campaign hnuaiah rualbanlote thlen/pan theih lohna a awm em tih zir chiang tura kal a nih thu a sawi a, "All India campaign a nih angin state hrang hrangah hmalak mek a ni a, Mizoramah pawh chak taka hmalak a ni. Zirna-in leh sorkar in zawng zawng rualbanlote tana thlen phakna a ni tur a ni a, toilet/bathroom-ah pawh rualbanlote hman tur bik siam a ṭul," a ti.

Sorkar laipuiin rualbanlote a ngaih pawimawh thu leh sorkar hun pawimawh leh thil tih engkim an hriat ve theihna turin interpreter (sign language thiamte) a hman uar tawh thu Vanlaldiki Sailo chuan a sawi bawk.

PwD Commissioner hian Lawngtlai DC pisa, LADC pisa, Lawngtlai District Hospital, Region Higher Secondary School leh Lawngtlai College te a tlawh a; rualbanlote tana remchanna an siamte a endik a; Lawngtlaia sorkar hotuten an ṭawiawm a ni.