Kum 2024-25 chhungin HIV vei Lawngtlai dist-ah 115 hmu chhuak

Lawngtlai district-ah sorkar kum 2024-25 chhung khan HIV vei mi 115 hmuh chhuah a ni a, mipat hmeichhiatna hman aṭanga kai an tam ber.

Mizoram State AIDS Control Society (MSACS) hotute leh Lawngtlai District AIDS Prevention and Control Committee (DAPCC) chu nimin khan additional DC David Lalrinawma kaihhruaiin DC conference hall-ah an ṭhukhawm a; Lawngtlai district-a HIV/AIDS dinhmun an thlirho bakah, hri inkai darh zel tur ven dan tur an sawiho.

Lawngtlai district AIDS control officer Dr Remlalnghaki tarlan danin, Lawngtlai district-ah hian kum 2024-25 chhung khan thisen endik 3,980 aṭangin HIV vei mi 115 hmuh chhuah a ni a, 2.89% a tling. HIV vei hmuh chhuah zingah mipat hmeichhiatna hman aṭanga kai an tam ber a, hriau inhman ṭâwm aṭanga kaiin an dawt.

Mi náwlpui (general client) zingah thisen endik 2,359 aṭangin HIV vei mi 111 (4.71%) hmuh chhuah a ni a; nu nau pai endik mi 1,621 zingah HIV vei mi pali (0.25%) hmuh chhuah a ni.

MSACS project director Dr Jane R Ralte chuan, Lawngtlai district chu Mizo-rama HIV high priority awm lohna a nih thu a sawi a, "High priority-a a kai loh nan khawtlang, kohhran leh NGO-te kan ṭan tlan a ngai. Mipui náwlpui zingah nasa lehzuala HIV test-a pawimawh a, mipui zirtirna kawngah theihtawp chhuah a ṭul," a ti.