Leivûng paihna tura siamah chauh paih turin contractor-te hriattir an ni

Lunglei bawrhsap Navneet Mann hoin nimin khan DC conference hall-ah Bharatmala Pariyojana hnuaia National Highway 54A & 302 (Hrangchalkawn-Tlabung) leh NH-54 (Aizawl-Tuipang) zauh leh siamṭhat hna thawh mek chungchang thlirho a ni a; leivûng paihna tura siamah chauh leivûng paih turin contractor-te an hriattir.

Ṭhutkhawmah hian sorkar hotute, kawng enkawltu National Highways & Infrastructure Development Corporation Limited (NHIDCL), hna thawktu contractor leh Lunglei Maxicab Owners Association aiawhte an tel a; Lungsen leh Tlabung inkar kawng laih hna 90% leh Sazaikawn leh Lungsen inkar laih hna 70% zawh a nih tawh thu tarlan a ni.

Leivûng paih vanga harsatna thleng mekte chu contractor-te'n leivûng dâwlna tur an siam loh vang leh a paihna hmun turah an paih loh vang nia ngaih a ni a, leivûng paih dan khauh lehzuala en zui tum a ni. Leivung paihna tur siam a, a dâwlna ṭha tak siam tur leh, paihna hmun tura siamah chauh paih turin kawng laitute chu hriattir an ni.

3-Gate leh Sazaikawn inkara kawng laih tharna hmuna lung leh lei tla mai theite chu a rang thei ang bera enfiah tur leh, chhiatna a thlen palh lohna tura hai fai turin contractor-te hriattir an ni bawk.

NHIDCL hotute chuan, NH-54 (Aizawl-Tuipang) kawngpui, Ṭawipui North-II khaw bula lirthei chetsual fona hmun chu an enfiah tawh thu leh kawng siam danah fel lo a awm loh thu an tarlang a; Lunglei DC office, PWD, MVI, NHIDCL leh NGO-te nen a hma lamin a hmunah enfiahin, a ṭul anga hmalak zui ni se, an ti.