KHAWTHLIR

AR-in thisen pe

Lungleia awm 20th Assam Rifles chuan nimin khan Lunglawna an hmunah thisen pek an huaihawt a, Lunglei Civil Hospital tan thisen unit 40 an pe a, petute mipa 38 leh hmeichhia pahnih an ni.

MLA-in lawmpui

South Tuipui bialtu MLA Jeje Lalpekhlua chuan nimin khan a bial chhung mi, kumin HSSLC Commerce-a pakuana Malsawmsangi, Hnahthial Electric Veng hnenah MLA Award 2025 a hlân. Award hian thuchei leh Rs 50,000 a keng a ni. Jeje Lalpekhlua South chuan, "Ka bial chhung zirlaite tan zirna kawngah hma an sawn zel theih nan an hmaah ka ding zel dawn," a ti.

Ration card la siam theih loh

Food, Civil Supplies & Consumer Affairs department chuan thuchhuah siamin, sorkar laipuiin SMART-PDS a la peih loh avangin ration card siam theih a la nih loh thu an tarlang a; ration card siam theih hun tur hriat a nih loh thu leh a rei tawh loh an beisei thute tarlangin, mipui hriatthiamna an ngen a ni.

In sak mek thlirho

Serchhip bawrhsap Paul L Khuma hoin nimin khan Serchhip khawpuia Circuit House leh sorkar hnathawkte chenna tur General Pool Accomodation sak mek thlirho a ni. In satu contractor-te chu Serchhip district tana thawk an ni tih hriaa theihtawp chhuah tur leh a ṭha thei ang bera thawk tura ngen an ni.

Sorkar dàwrna remchang siam

Phullen BDO J Lalhmahruaia hoin nimin khan Phullen RD Block huam chhunga Daido, NE Tlangnuam, Khawlian leh Phuaibuang khuaah mipuite'n an kawtkaia sorkar an dawr theihna turin ‘Doorstep Delivery of Government Services Programme’ buatsaih a ni. BDO office-a thawktu mi 27 an tel a; MGNREGA hnuaia VEC hnathawh hrang hrangte enfiah nghal a ni.