Women for Trees kalpui ṭan a ni

Urban Development & Poverty Alleviation (UDPA) department bultumin nimin khan Aizawl leh district khawpui hrang hrangah Ministry of Housing and Urban Affairs hnuaia AMRUT Mitra Initiative-a 'Ek Ped Maa Ke Nam' campaign kal zelah 'Thingphun Campaign: Women for Trees' kalpui ṭan a ni.

Women for Trees campaign hi nimin khan UDPA director Jacob Lalawmpuia'n Edenthar Venga BSUP hmunah a hawng a; Atal Mission For Rejuvenation and Urban Transformation (AMRUT 2.0) hnuaia thawktute bakah, Deendayal Antyodaya Yojana - National Urban Livelihoods Mission (DAY-NULM) hnuaia self help group member-te an tel.

Thing phun campaign hnuaiah hian Aizawlah chuan hmun pali Edenthar BSUP, Durtlang BSUP, Lawipu BSUP leh RAY Falkland Vengahte kalpui a ni dawn a, nimin leh vawiinah thing phun hmun tur enfiah tura tih niin, June thla chhungin thing ṭhahnem tak phun tum a ni.

‘Women for Trees’ campaign-in a tum ber chu hmeichhia self help group (SHG)-te kaihhruaina hnuaiah thing a tam thei ang ber phun a ni a; UDPA department kaihhruainain Mizorama hmun 46-ah SHG member 518-te'n thing an phun dawn a ni.