SWD Minister-in home hotute a kâwm; 'Sorkarin training pek a tum' - Lalrinpuii

Social Welfare minister Lalrinpuii chuan nimin khan a pisaah Aizawl leh a chhehvela ruihhlo ngaite enkawlna home/centre enkawltute a kâwm a; home/centre-te lakah dan angin accreditation kalpui a ni tawh dawn thu leh sorkarin training pek a tum thu leh kawng hrang hrangin puih a tum thu a sawi.

Minister Lalrinpuii hian Ṭawngṭai Bethel Camping Centre (ṬBCC) leh Operation Kingdom Ministry(OKM) hotute a kâwm a; sorkarin dan angin home/centre hrang hrangah accreditation a kalpui tawh dawn a, dan hnuaiah minimum standard zawm a nih theih nan sorkarin home/centre-te chu training pek a tum thu leh kawng hrang hranga puih a tum thu a sawi a ni.

Lalrinpuii chuan, ruihhlo ngaite enkawl chungchangah kohhran hrang hrang hruaitute chu puitu tura sàwm an nih thu a sawi a; ṬBCC leh OKM hotute pawhin dan hnuaia inkaihhruaina mumal tak nena kal a ni tur chu an lawm thu leh, sorkar, kohhran leh tlawmngai pawlte nena thawh tlan chu an duhthusam a nih thu an sawi.

ṬBCC hotute nena inkawmnaah hian ṬBCC dintu Zohmingthanga leh ṬBCC Advisory Board hotute an tel a; ṬBCC ṭha zawk, langtlang zawk leh inkaihhruaina mumal zawk nena kalpui dan tur sawiho a ni.

ṬBCC hotute chuan, dan hnuaia mumal taka kal chu an duh dan a nih thu leh lawmawm an tih thu an sawi a; ṬBCC aṭanga chhuak ruihhlo ngai, hawna tur nei loa khawlaia tei rawlaite ṬBCC-in a rang thei ang bera an enkawl leh dan tur an sawiho nghal.

ṬBCC-a lut turin admission mumal zawka tih tum a nih thu te, a hmunhmain a zawh tawk la turin an inruahman thu te, Advisory Board chairman Vanhela Pachuau kaihhruaina hnuaiah uluk zawka an vil tawh dawn thute sawi a ni bawk.

Phunchawnga hmun nei OKM hotute sawi danin, OKM-ah hian ruihhlo ngaite Pathian thu zirtirna an kalpui a, mi 400 an awm mek. Firms & Societies-ah an inziak lut a, mi thil pek khawm aṭanga kal an ni ber a; chutih rualin, home-a awmte chu a huhoa an inhlawh ṭhin bakah, vawk leh ar an vulh a, thlai huan an siam bawk a ni.