Mizoram tana medal late lawmpui

Sports & Youth Services minister Lalnghinglova Hmar chuan nimin khan a pisaah Khelo India Youth Games, 2025-a boxing leh mipa football-a medal late hnenah lawmpuina a hlan. Medal latute hi August 29, 2025-ah Mizoram sorkarin Incentive Cash Award a pe dawn.

May 4-15, 2025 chhung khan Bihar khawpui Patna-ah Khelo India Youth Games 2025 neih a ni a, Mizoram aṭangin infiamna huang (sport discipline) pasarihah infiammi 34 leh anmahni hruaitu mi 10 an tel. Boxing-ah Samuel Zadeng s/o ZD Lalremsanga, Bawngkawn Brigade-in kg. 65-70 huangah gold medal a la a; mipa football-in bronze medal an la bawk.

Lalnghinglova Hmar chuan, medal latute a lawmpui thu sawiin, "Mizoramin gold medal kan la tih ka hriat khan ka lawm hle a, a chhan chu national level-ah chuan medal lak hi thil harsa tak a ni. Sport hmasawnna hi sport person-ah a lang tur a ni a, medal lak dan zel an en avangin medal lak a pawimawh," a ti a; football team-te pawh a chhuan thu sawiin, nasa lehzuala thawk rim turin a chah a ni.