Electric bill-ah chî-âi lo turin ngen

Power & Electricity Engineer-in-Chief chuan thuchhuah siamin, electric bill chungchangah thu dik lo thehdarh an awm thu a tarlang a; chî-âi lo turin mipui a ngen.

PE E-in-C chuan, Commission-in PE department hnenah sorkar chu langtlang a nih theih nan sorkarin mipui tana electric bill a peksak (subsidy) zat mipuiin an chhût chhuah ve theihna tur tilang tura a tih thu a tarlang a, "Bill lehkha (body)-ah tilang ngei turin Commission chuan department a ti a, May thla bill form hi pre-printed a nih avangin subsidy tarlanna tur column a la awm lo. Chuti chung chuan mipuiin sorkar aṭanga electric bill subsidy an dawn zat an hriat ve theih nan slab rate zâwnah subsidy tel lo rate tarlan a ni a, he rate hi mipui chawi tur zat a ni lo," a ti.

Mi ṭhenkhatin subsidy tel lo rate hmanga electric bill chawi tur zat chhût chhuahna an siam thu tarlangin E-in-C chuan, "Social media-ah mipui tichî-âi thei zawngin sorkarin electric bill a tisang angin thu an thehdarh a, heihi thu dik lo niin, sorkarin electric bill a tisang lo," a ti a; mipuiin an chawi tur zat chu bill lehkha hnung lamah tarlan a nih thu a tarlang.