PWD Minister-in kawng chhia a en

PWD minister Vanlalhlana chuan nimin khan National Highway-06 kawngpuia Buichali leh Sairang inkara kawng chhe zual laite a hmunah a enfiah a; tun aia chak lehzuala kawng siam turin kawng enkawltu National Highways and Infras-

tructure Development Corporation (NHIDCL) hotute a chah.

Vanlalhlana chuan, NH-06 chu Mizoram châk lakna kawngpui pawimawh ber zinga mi a nih avangin engtik lai pawha lirthei zawh tlaka a awm a ṭul thu a sawi a; NHIDCL hotute chu mipui, a bikin lirthei hmanga eizawngte'n harsatna an tawh dante hrilhfiahin, tun aia chak lehzuala kawng siam turin a chah a ni.

Kawngpui dinhmun enfiahnaah hian Public Works Department (PWD) hotu te, NHIDCL aiawh te, Mizoram Truck Owners Association (MTOA) leh Mizoram Truck Drivers Association (MTDA) hruaitute an tel.

Enfiahnaah hian Sairang-Buichali inkarah hmun 20 dáwnah lirthei lian tana zawh harsa khawpa chhia a awm tih hmuh a ni. NHIDCL, MTOA leh MTDA aiawhte chuan, May 23, 2025 aṭanga sâwt lehzuala kawng siam a nih theih nan an inrâwnkhawm tur thu an sawi a; MTOA leh MTDA aiawhte chuan chak zawka kawng chhia siam a nih theih nan kawng siam chhung, zing dar 9 aṭanga tlai dar 5 inkarah lirthei dintir an inhuam thu an sawi bawk.

MTOA leh MTDA hian Buichali leh Sairang inkara kawng chhe zual laite May 23, 2025 thlenga siam a nih loh chuan truck-te dintir an tum thu May 16, 2025 khan an lo puang tawh a; "Truck a tlûk tâk nual avangin a chhe zual hmun thum hmun li tal hi hnawh hram turin thuneitute kan ngen a ni," tiin, mipui hriatthiamna an dil a ni.