India-a ziak leh chhiar thiam vekna state hmasa ber nih hi mellung hlu tak a ni - CM

Chief minister Lalduhoma chuan, India ram state leh union territory zinga ziak leh chhiar thiam vekna (fully literate) state hmasa bera Mizoram puan a ni ta chu chhuanawm a tih thu leh Mizoram tan mellung hlu tak a nih thu a sawi.

CM Lalduhoma hian nimina ziak leh chhiar thiam vekna state hmasa ber atana Mizoram a puannaah thu sawiin, "Mizoram tana hun chhinchhiah tlak, Mizoram chanchina hriat reng tawh tur méllung hlu tak kan phun a ni," a ti.

Ziak leh chhiar thiam vekna state hmasa ber Mizoram a nih theihna tura thawktute zawng zawng chungah a lawm thu sawiin Lalduhoma chuan, "Mi pahnih khat thawhrimna zara lo thleng a ni lo a, ram hmangaihtu, rim raka thawk mi tam takte zara thleng kan ni. An zinga pawimawh ber chu ziak leh chhiar thiam nih duh a, kum upat hnu pawha la zir leh hram hram kan ṭhian mi 1,692-te an ni," a ti a; tuna zir ṭul la ti rih lote pawh an rawn zir duh hun nghakhlel taka an lo thlir thu a sawi.

Chief Minister chuan, tuna literacy campaign chu a la tawp lo tih sawiin, "Financial literacy, digital literacy leh entrepreneur skill tea hmasawn zel tura bul kan ṭan ní a ni. Mizoram hi ziak leh chhiar thiamna state mai ni loin, mithiam tam tak awmna state-ah siam kan tum a, chu ram kan thlen theih nan chuan mi tinin mawhphurhna kan nei ṭheuh a, i ṭang tlang ang u," a ti.

Union Education minister of state Jayant Chaudhary chuan Mizoram a lawmpui thu sawiin, "He hun thleng thei tur hian ram hruaitu ṭha neih a ngai a, thawktu ṭha leh khua leh tui ṭha neih a ngai. Mizoram chuan a mamawh tinreng in nei vek mai a ni," a ti a; themthiamna tihhmasawnna lama Mizoram hmalaknate a hmuhpui thu sawiin, ITI-te pawh an thuam ṭha nasa dawn a, Mizoramin hmakhaw êng tak a neih thu a sawi.

Mizoram Education minister Dr Vanlalthlana pawhin thu sawiin, fully literate state ni tura thawktu zawng zawng chungah a lawm thu a sawi a, "Education department leh a thawhpui institution zawng zawnga thawktute thawhrim rah a ni a, kan tlawmngai pawl leh kohhran ten an thawh hlawk em em bawk," a ti.

India rama ziak leh chhiar thiam vekna state hmasa ber atana Mizoram puanna inkhawm hi chief secretary Khilli Ram Meena-a'n a kaihruai a; Mizoramin ULLAS hnuaia fully literate state a thlen dan kalkawng a sawi a ni.