Sericulture demonstrator lak dan chhuitu tur inquity committee din

Sericulture department-a thawk tur demonstrator pali tun hnaia laknaah thil dik lo a awm nia sawi chhui turin Sericulture department chuan Inquiry Committee a din.

Sericulture demonstrator pali laknaah thil dik lo a awm ngei nia an hriat avangin MZP chuan May 21, 2025 ral hma ngeiin thil awm dan chhuitu tur committee din turin sorkar an phût a ni. MZP chuan, an phût anga sorkarin Sericulture mi leh sa ni lo, department pawn lam mi Inquiry Committee atan a ruat chu lawmawm an tih thu an tarlang a, "Ni 30 chhungin report peih hman tura beisei an ni," an ti.

MZP tarlan danin, Sericulture demonstrator tur pali lakna atan hian February 17, 2025-ah advertisement tihchhuah niin, pay level 4 a ni a; diltu mi 38 chuan April 8-9 chhung khan exam an hmachhawn a, personal interview atan mi 32 an tling. May 7-ah interview neih niin, demonstrator atana thlan mi pali hnenah May 8 khan appointment pek a ni.

Sericulture demonstrator lakna atana exam buatsaihah mi ṭhenkhatin examination hall-ah mobile phone an keng lut a, chu chu exam hmachhawntu zinga ṭhenkhatin complaint mah se, exam kaltlangpui a ni tih MZP chuan an tarlang.