YMA-in Career Fair an buatsaih

YMA, Electric Veng Branch Literature & Education Sub-Committee chuan May 17, Inrinni khan an YMA Hall-ah an venga zirlaite tan Career Fair an buatsaih a, Lt.Col. Clement Lalhmingthanga, MLA-in a hawng.

Career Fair-ah hian stall hrang hrang awmin, Arts, Science, Commerce, Manage-ment/Baking, Hospitality/Tourism leh Law lam zirna inkawhhmuhna atan stall hawn a ni a; sipai, infiamna, medical leh engineering lama tui mite tan stall siam a ni bawk. Stall-ah hian thiamna bik nei leh hlawhtlinna nei tawhte ràwn theihin an ṭhu a ni. ITI, ICFAI University, Medhavi Foundation leh Women Polytechnic te an tel bawk.

Pawl 10 leh 12 zir zo chiahte leh pawl 11 zir chho turte tan kawng inkawhhmuhna leh infuihtharna buatsaih nghal a ni a; Mizoram University associate professor Dr R Zothanliana leh MPS officer Lalrinzuali ten thu an sawi.

Fair hawngtu Lt.Col. Clement Lalhmingthanga chuan, zirlaite chu an zir zelna turah duhthlanna hmang thiam tur leh, nakina an inchhir lohna turin ngaihtuahna fîm duh­thlanna siam turin a chah.