Digital Transformation Conclave buatsaih; Online lamah ṭan kan la - CM Lalduhoma

Department of Information and Com-munication Technology (ICT), Govconnect, Google Cloud leh Ilouge Media-te chuan nimin khan Dawrpui Multipurpose Hall-ah Digital Transformation Conclave vawi 17-na an buatsaih a; chief minister Lalduhoma'n hawngin, online lamah ṭan an lak thu a sawi.

Lalduhoma chuan, internet kaltlanga mipui hnena service pek ṭang­kaina leh awlsamna te, mipui leh sorkar tana awlsamna thlen thei a nihnate an hriat avangin online service-ah ṭan an lak thu a sawi a, "Mipui Aw - Mizoram State Public Grievances Redressal & Monitoring System chang­tlung zawk kan hawng nghal a, a hnuah KAI Apps, RAMP-MSME Facilitation Cell and Portal, SDG Dashboard, Mizoram State Project Monitoring Dashboard, internet hmanga Revenue depart­ment dawrna tur, online ILP, Civil Hospital Aizawl online OPD card-te leh thil dang dang kan kalpui," a ti.

E-office kalpui tura an inbuatsaih mek thu sawiin Lalduhoma chuan, "Artificial intelligence, cloud computing, cybersecurity leh data analytics thlengin ram inrelbawlna leh mipui tana hna thawhnaah a ṭul angin hma kan la zel ang. Kan hmalaknaah hian ṭhalai thiamna neite tan zau takin kan inhawng," a ti a; Mizoram leh India ramin digital service lama hmasawnna a hmuh zel theih nan thawhpuiah kal khawmte a sáwm.

Chief Minister chuan, May 15, Ningani zanah Mizoram sorkar website pakhat hacker-te'n an tihbuai thu sawiin, "Rang takin kan siamṭha (recover) lehnghal. Tun hnaiah kan website dangte pawh an rawn bei zauh zauh a, mahse, ICT lama kan thawktute'n an lo dang thei zel rih," a ti a; mipui tlawh tam website, a bikin dot gov enkawltute fimkhur zual turin a chah.

ICT minister Dr Vanlalthlana pawhin thu sawiin, "Artificial intelligence hian mi tin nun a khawih tawh. Loneituin a mamawh a, nu leh pate'n an fate venhimna hmanruaah an mamawh. Ṭangkai taka mipuite'n kan chhawr theih nan internet service chak, mi tin thleng phak kan mamawh a, Cloud service lamah data him neih kan mamawh bawk," a ti a; Viksit Bharat 2047 panna kawngah digital service hmalakna a pawimawh thu a sawi.

Conclave-ah hian chawhnu lamah official leh company mithiamte'n digital service hmanga ram tana hmalak theihna an sawiho a ni.