CUET-a Mizo zirlaite chungchangah MSU-in NTA Director lehkha thawn

India ram puma Common University Entrance Test (CUET) 2025 neihah Mizo zirlai tam tak state pawna exam centre-a dah an nih avanga harsatna an tawh chungchangah Mizo Students’ Union (MSU) chuan nimin khan CUET buatsaihtu National Testing Agency (NTA) director Pradeep Singh Kharola hnenah lehkha an thawn a, harsatna chinfelpui turin an ngen.

CUET hi central university hnuaia under graduate leh post graduate zir tur tana India ram chung college leh university hrang hranga admission ti thei tura paltlang ngei ngai a ni.

MSU tarlan danin, CUET 2025 atan hian Mizo zirlai tam takin application an thehlut a, mahse, Mizo zirlai zinga tam tak chu Mizoram pawna exam centre-ah exam tura tih an ni.

Mizo zirlaite Mizoram pawna CUET exam tura tih an nihin sum leh pai harsatna avangin zirlai tam takin CUET an hmachhawn loh phah ṭhin tih sawiin MSU chuan, "CUET 2025-a Mizo zirlai Mizoram pawn exam centre-a test pe tura allot tawh zawng zawngte Mizoramah ngei an exam theih nana hma la tura ngenna NTA Director hnenah kan thehlut ta a ni," an ti.