LC hotute pualin zirhona buatsaih

Aizawl DC Office chuan nimin khan DC Pisapui Hall-ah Aizawl Municipal Corporartion (AMC) huam chhunga local council 87-a local council chairman leh secretary-te pualin LC kaihhnawih thil pawimawhte inzirtirna an buatsaih a, bawrhsap Lalhriatpuia'n a hmanpui.

Lalhriatpuia chuan, DC office-in mipui rawng a bâwlnaah LC-te chu kutke pawimawh ber an nih thu a sawi a, "Thawhhona ṭha neih bakah intuaithar ve reng a ṭul a, nangni lam aṭang pawhin rawtna ṭha leh in mi finchhuahna hi kan mamawh reng a ni. Fûrpui thleng tur kan ni a, chhiatrupna laka kan veng chhung ṭheuhte a him theih nan inralring renga in awm a ṭul," a ti a; chhiatna thleng thei tihnêpna leh pumpelhna tura hriattirna tihchhuah chu mahni huam chhung ṭheuhah zawm a nih leh nih loh ṭha taka vil turin a chah.

Training hi additional DC PC Zonuntluangi'n a kaihruai a; assistant commissioner F Lalnisai'n income, residential, schedule tribe certificate, etc chungchang a sawi a, SDC Lalngaihawmi'n ILP chungchang a sawi. PM Vishwakarma chungchang leh PM Surya Ghar (solar rooftop) chungchang inzirtir a ni bawk.