Bualte-ah 'I Kawtkaiah Sorkar' buatsaih

Lunglei DC office hmalaknain nimin khan Bualte leh a chhehvel khaw mipui tan Bualte community hall-ah 'I Kawtkaiah Sorkar' (Prashasan Gaon Ki Ore) tih hun hman a ni a; mipui awlsamna atan dawr theih turin sorkar department hrang hrangte'n hun an hmang.

Bualte khuaa 'I Kawtkaiah Sorkar' hun buatsaih hi Lunglei district civil supply officer Lalremruata Sailo, Lunglei BDO mawhphurhna la mektuin a kaihruai a; Lunglei sub-deputy commissioner Lalrampari'n hmanpuiin, Bualte Village Council president Malsawmkima pawhin lawm thu a sawi.

I Kawtkaiah Sorkar tihah hian Lunglei DC Election Branch, Agriculture, Horticulture, Animal Husbandry & Veterinary, Education, Women & Child Development (ICDS), Rural Development Block Development Office, FCSCA, Power & Electricity, Commerce & Industries, DTO, Health & Family Welfare, PHE leh Mizoram Rural Bank-te mipui dawr theih turin an inhawng a ni.

Electoral roll enfiah/inziah luh, Aadhaar card siam, income/tribal/residential certificate dil leh siam, ration card siam ṭhat, bank account hawn, hriselna dinhmun endik leh ABHA card siam, ran entir leh hri danna pek, thei leh thlai chi sem, sorkar scheme hrang hrang inhrilhfiah leh inziah luh bakah, mipui harsatna thlenna hunte buatsaih a ni.