Kuminah Lunglei health district-ah TB vei mi 39 enkawl dam, mi 2 thi

Lunglei District TB (Tuberculosis) Forum chu additional DC Rochuangkimi Khenglawt hoin nimin khan DC conference hall-ah an ṭhukhawm. Kuminah January - April chhungin Lunglei health district-ah ngawr (TB) vei mi 44 hmuh chhuah an ni a, mi 39 enkawl dam tawh niin, mi pahnih an thi tih tarlan a ni.

Ṭhutkhawmah hian sorkar hotu te, tlawmngai pawl leh MJA aiawhte leh TB vei enkawl dam tawh (TB champion)-te an tel. Kum kal ta leh kum kal meka TB chungchanga hmalaknaa Lunglei district dinhmun thlirho a ni a, TB ûm bo tura '100 Days TB Intensified Campaign for TB Elimination' kalpuinaa hmachhawpte leh rawtnate sawiho a ni.

Tarlan danin, January-April, 2025 chhungin Lunglei health district (Lunglei district leh Hnahthial district)-ah TB vei rinhlelh enfiah mi 644 aṭangin chuap TB mi 24, chuap ni lo TB mi 17 leh MDR-TB mi pathum, an vaiin mi 44 hmuh chhuah a ni. Kuminah TB vei mi 39 enkawl dam an ni a, enkawl laia thi mi pahnih an awm.

January-December, 2024 chhungin Lunglei health district-ah TB vei rinhlelh mi 3,772 enfiahna aṭangin chuap TB mi 77, chuap ni lo TB mi 66 leh MDR-TB mi pali, an vaiin mi 147 hmuh chhuah a ni a; mi 134 enkawl dam niin, TB vei enkawl lai mi paruk an thi.

Lunglei health district chhunga khaw 186-ah kum 2023 khan TB awm lohna khua (TB free village) 18 a awm a, kum 2024-ah 22 an awm. Kum 2023-a TB free village zinga kum 2024-a puan nawn (Mahatma Gandhi Statue Silver dawng) khaw pakua a awm a, a kum khatna atana puan thar (Mahatma Gandhi Statue Bronze dawng) khaw 13 a awm bawk.