Lunglei district-a sawhthing lei nan support price Rs 4,21,62,450 pe tawh

Lunglei district-ah May 14, Nilaini thleng khan Bána Kaih (Handholding) hnuaia sawhthing lei/hralh thawh khatna aṭanga thawh thumna thlengin sorkarin quintal 8,432.49 atan support price Rs 4,21,62,450 a pe chhuak.

Lunglei District Agricul-tural Marketing Committee (DAMC) chu an chairman Navneet Mann, bawrhsap kaihhruaiin May 14, Nilaini khan an ṭhukhawm a; Bana Kaih kaltlanga thlai thar lei leh hralh chungchanga hmalaknate an thlirho bakah, hmachhawpte an sawiho.

Mizoram sorkarin February 20, 2025 aṭanga kut hnathawktute sawhthing thar lei/hralh a kalpui hnuah May 14, 2025 thlengin Lunglei district-a secondary collection centre (SCC) paruk - Hrangchalkawn, Ṭawipui North-I, Haulawng, Buarpui, Thenhlum leh Phairuangkai khuate sawhthing lei a ni.

Lunglei district-a SCC kaltlanga sawhthing lei thawh khatna leh thawh hnihnaah quintal 5,667.05 leina man kut hnathawktute bank account-ah support price cheng nuai 283.35 pek a ni.

Sawhthing lei/hralh thawh khatnaah quintal 1,788.59 atan support price Rs 89,42,950 leh thawh hnihnaah quintal 3,878.46 atan Rs 1,93,92,300 chu kut hna thawktute bank account-ah thun a ni a; thawh thumnaah quintal 2,765.44 atan support price Rs 1,38,27,200 pawh tihfel tawh niin, bank-ah dah luh mek a ni.