Minister-in sangha khawina báwm a sem

Fisheries department leh ICAR-CIFRI, Kolkata ṭang dun chuan nimin khan Fisheries conference hall-ah 'Awareness cum input distribution programme for popularization of ornamental fisheries in schools of Mizoram' an buatsaih a; Fisheries minister Lalthansanga'n hmanpuiin, sikul 50 hnenah fibre glass aquarium leh hmanrua a sem.

Lalthansanga chuan, ICAR-CIFRI hmalakna ṭha a tih thu a sawi a, "He programme hian Mizorama sikul naupangteah nungcha leh tui chhunga cheng thil nungte ngaihven tharna leh ngaihhlutna a pek thar ngei ka beisei a, sikul tam zawkah hetiang programme hi kalpui zel ni se a duhawm," a ti.

Fisheries Minister chuan sikul aiawh kal khawmte chu an thil dawnte uluk taka enkawl tur leh, zirlaite tan zirlai ṭha tak, boruak leh nungchate pawimawhna leh ven him nachang an zir chhuah theih ngeina tura ṭan la turin a chah.

Programme buatsaih hi Mizorama sikul naupangte hnenah sangha khawina bâwm (aquarium)-a sangha khàwi tihlarna leh sanghate hlutna inzirtirna tura buatsaih a ni a, Fisheries secretary Lalrothanga pawhin thu a sawi.

Chawhnu lamah ICAR-CIFRI scientist Dr Rakesh Kumar leh technical officer Bipul Chandra Roy ten sikul hrang hrang aiawh kal khawmte aquarium enkawl dan an zirtir a ni.

CIFRI, Guwahati principal scientist Dr Sullip Kumar Mahji chuan, ICAR-CIFRI, Kolkata bultumin hetiang proramme hi hmarchhak state hrang hrangah an kalpui mek thu leh sangha khawi kaihhnawiha hmasawn theihna tura buatsaih a nih thu a sawi.