KHAWTHLIR

Thisen pe

Kolasib-a CZ Higher Secondary School NSS chuan nimin khan an sikulah thisen pek an huaihawt a, Kolasib District Hospital tan thisen unit 50 an pe a, petute hmeichhia 27 leh mipa 23 an ni.

DC-in kawng enfiah

Lawngtlai bawrhsap Cheemala Siva Gopal Reddy chuan nimin khan Lawngtlai by-pass road leh NH-54 inpawhna, 71 RCC-a lirtheia chetsualna ṭhin hmun a tlawh a; kawng enkawltu NHIDCL hotute leh contractor-te chu a rang lama rumble strips (speed breaker) leh ṭul dangte dah turin a hriattir. Bawrhsap chuan, kawngpui intawhna hmun (tri-junction) a nih avangin lirthei khalhtute fimkhur turin a chah bawk.

Mock drill neih rêl

Khawzawl District Disaster Management Authority (DDMA) chu an chairman K Vanlalṭhiana, bawrhsap hoin nimin khan an ṭhukhawm a; ṭhutkhawm hmasaka thurelte bawhzui dan thlirhoin, Civil Defence Plan siam tawh angin 2nd IR hmunah mock drill neih an rel. Bawrhsap chuan, mipui himna ngaihtuah kawngah theihtawp chhuaha ṭang zel turin kal khawmte a chah.

Minister-in tlawh

Agriculture minister PC Vanlalruata chuan nimin khan Saitual District Agriculture office leh Ginger Processing Unit sakna hmun tur a tlawh a, district bawrhsap Dr Lalngura Tlau leh DAO Hmangaihthangi Renthlei ten an lo dawngsawng. Minister chuan, kut hnathawktute an din chhuah theih nan theihtawp a chhuah zel tur thu a sawi.

SCWFC ṭhukhawm

State Consumer Welfare Fund Committee chu an chairman Teresy Vanlalhruaii, Food, Civil Supplies & Consumer Affairs secretary kaihhruaiin nimin khan an ṭhukhawm a; Consumer Welfare (Corpus) Fund pek chhuah tura dilna lut leh fund pek chhuah dan tur rawtnate an thlirho. Fund diltute'n awmze nei leh dik zawka dilna an thehluh theih nan Standardised Application Format for Submission of Project Proposal siam rem a ni.