RD Minister-in Central hotute a dâwr; MGNREGA sum rawn pek thuai tum

Rural Development & Administration minister Prof. Lalnilawma chuan nimin khan New Delhi-ah a department enkawl kaihhnawih sorkar laipui hotute a dawr a; Ministry of Rural Development hotute'n MGNREGA hnuaia mipui inhlawhna pawisa leh thawktute hlawh turte chu a rang thei ang bera pek a nih tur thu an lo hrilh.

Prof. Lalnilawma hian sorkar laipuia Rural Development minister of state Kamlesh Paswan leh secretary Shailesh Kumar Singh te a kâwm a; Ministry of RD hotute hian MGNREGA hnuaia parameter hrang hrangah Mizoram chu state ti ṭha ber pawl a nih avangin a rang thei ang bera mipui inhlawhna leh material component bakah, thawktute hlawh tur (administrative cost) a rang thei ang bera Mizoram hnena pek a nih tur thu an lo hrilh a ni.

PMAY-G chung­changah sorkar laipui hotute chuan, state sorkarin a mamawh ang zela thawktu rawih nan administrative cost 2% piah lam thlenga hman phal sak an nih thu Minister an lo hrilh a; Mizoram sorkar chu rawtna siam vat turin an chah. PMAY-G Regional Conference pawh kumin kum tawpa Mizorama neih theih dan turte an sawiho nghal bawk.

RDA minister Prof. Lalnilawma hi additional secretary V Lalengmawia'n a ṭawiawm a ni.