Mizoram hi thlai chi hrang hrang ṭhat duhna a ni - Union Agri. Minister

Union Agriculture & Farmers' Welfare minister Shivraj Singh Chauhan chuan video conference hmangin Horticulture College, Thenzawla Academic cum Administrative building leh College of Veterinary Sciences & Animal Husbandry, Selesiha PG Girls Hostel thar a hawng a; Mizoram chu thlai chi hrang hrang ṭhat duhna a nih thu a nih thu a sawi.

Shivraj Singh Chauhan hian a thil hawnte hi Thenzawlah kala hawn a tum a, Guwahati leh a chhehvelah khua a ṭhat loh avangin chawpchilh takin a hmuna kal a ṭhulh a, video conference hmangin a hawng ta a ni. Hawnna inkhawm hi Governor Gen. Vijay Kumar Singh chuan a pisa aṭangin online-in a chhim a, chief minister Lalduhoma'n Horticulture College, Thenzawlah a hmanpui.

Shivraj Singh Chauhan chuan, Mizoram chu ram nuam leh rálmuang a nih thu sawiin, "Thlai chi hrang hrang ṭhat duhna a ni a, Horticulture thlai thar chhuahna hmunpui ni thei khawpa ram ṭha a ni," a ti a; sorkar laipuiin Mizoram loneitute leh kut hnathawktute tana hmalakna a neih langsar zualte a sawi.

Agriculture & Farmers' Welfare Minister chuan, Mizoram chu tlang ram a nih vang te, leilung luang ral chak lutuk vang leh loneituite'n kum tin lo neih bànsan harsa an tih vangtein chona lian tak Mizoramin a hmachhawn thu a sawi a, "Heng kan hmaa chona awmte hmachhawn a, kut hnathawktute'n hlâwkna leh hmasawnna ngêlnghet an neih theih nan Horticulture College leh CVSAH kan thuam ṭha zel a ni," a ti.

Larsap Gen. VK Singh chuan, Mizoram economy chu agriculture leh a kaihhnawih dangtea innghat a nih thu sawiin, "Mizoram pumpuia 55% chu horticulture hmalak theihna a ni a, leh heng zinga 10% chauh a taka hman ṭangkai a ni," a ti a, hmalakna tur tam tak a la awm thu a sawi.

Gen. VK Singh chuan, Mizoramah farmer producer organization, cooperative, supply chain leh market mumal tak hmangin hmasawnna lian tham siam theih a nih thu a sawi a; Thenzawl Horticulture College chu sawrkar laipuiin horticulture-a Mizoram theihna hriaa hmasawnna nasa zawk nei tura hma a lakna a ni tih sawiin, "Organic thlai thar kawngah ṭan lak a ṭul a, Mizoram mai ni lo, khawvel zau zawk thleng thei tura ṭan lak tlan a ṭul," a ti.

Horticulture College campus-a hawnna inkhawm hmanpuitu CM Lalduhoma chuan, Central Agriculture University (CAU) hnuaia CVSAH leh College of Horticulture, Mizoramin a kawlte chu Mizoram leh hmarchhak state mai ni lo, India ram tan zirna hmun hlu bik a nih thu leh, hma an sawn zel thu a sawi.

Lalduhoma chuan, Mizoramah horticulture leh animal husbandry behchhana eizawng an tam tih sawiin, "Kan farmer-te hian hmasawnna tur an la ngah a, horticulture lama hmalak theihna ram kan la ngah hle. Anni ṭanpui tur hian kan college pahnihte hian tih theih tam tak an neiin ka hria a, farmer outreach programme uar takin kalpui ṭhin se a lawmawm hle ang," a ti.

Hawnna inkhawmah hian Central Agriculture University, Imphal vice chancellor Dr Anupam Mishra pawhin thu a sawii bawk.

Shivraj Singh Chauhan-a'n a hawn tak CVSAH, Selesih-a PG Girls Hostel thar hi zirlai 57 awm theihna tur a ni a; Horticulture College Academic cum Administrative building chu chhawng lia sang a ni.