LADC CEM Zangura fiahna tur High Court-in a ṭhiat lailâwk

Governor chuan Lai Autonomous District Council (LADC)-a chief executive member (CEM) thar N Zangura chu thlawptu a ngah leh ngah loh nimina fiah turin a hriattir a; Governor hriattirna hi Gauhati High Court chuan nimin khan a ṭhiahsak.

Thu dawn danin, Mizoram Governor thu angin N Zangura fiahna atan May 15, Ningani chawhma dar 10:30-ah 'floor test' nei turin tun hnai khan hriattirna chhuah a ni. Mahse, ZPM sorkarna hnuaia CEM aṭanga paih tâk V Zirsanga chuan CEM a nih lai renga BJP kaihhruaina hnuaia N Zangura CEM atan Governor-in May 2, 2025-a a ruat chu dan kalh a ni tiin Gauhati High Court-ah a khing a ni.

Governor thu anga May 7, 2025-a hriattirna chhuahah, CEM atana V Zirsanga ruatna chu dan dik lo a nih thu leh, V Zirsanga hoa LADC session-in LADC budget 2025-26 pawm tawh ṭhiah a ni chu V Zirsanga chuan a khing tel bawk.

High Court-a V Zirsanga a zualko chhan ber chu, CEM aṭangin Governor-in bàntir theihna a nei lo a, India Danpui leh LADC Conduct Rules 2010 hnuaiah pawh Governor-in CEM bàn turin thuneihna a nei loah a ngai a; Governor-in induhsak bikna vangin dik lo takin CEM ni lai bànin BJP sorkartir tumin N Zangura chu CEM atan a ruatah a ngai a ni.

V Zirsanga zualkona hi Gauhati High Court chuan a ngaihtuah a, thubuai chinfel a nih hma chuan CEM atana ruat N Zangura fiahna tura nimin chawhma dar 10:30-a floor test neih tum chu a ṭhiahsak rih ta a ni.

He thubuai hi High Court chuan June 11, 2025-ah a ngaihtuah leh ang.