Vanglaini logo

NIELIT-ah B.Tech leh M.Tech zirna hawng

National Institute of Elec­­tronics and Information Tech­nology (NIELIT) director general Dr MM Tripathi chuan nimin khan NIELIT, Aizawl (Deemed to be University)-ah B.Tech leh M.Tech zirna thar a hawng a; Mizoram sorkarin NIELIT, Aizawl hnenah ram a pek belh theih chuan course tam zawk dah belh a nih tur thu a sawi.

Dr MM Tripathi chuan, Deemed to be University-ah NIELIT, Aizawl hlan kai a nih avangin Mizoramah central university dang pakhat a awm belh tih a sawi a, "NIELIT University hi university dangte ang loin, mamawhna a zirin zirlaite'n an duhna lai tak mil turin course-te siam a ni ṭhin a, tunah Mizoram sorkarah NIELIT Aizawl tihlenna tur ram dil mek a ni a, ram min pek theih chuan zirna dang hawn belh a ni ang. Mizoram sorkar nen thawhhona ṭha tak kan neih ṭhin a, ram kan dilnaah pawh beiseina sang tak kan nei," a ti.

NIELIT Director General chuan, "NIELIT zirlaite hian hamṭhatna tur tam tak an nei a, he hmun aṭanga zir chhuakte hian hna zawnna bakah mahni kut­kawiha eizawnna (entre­pre­nuership) lamah pawh an tan kawng a inhawng zau hle," a ti a; NIELIT chu India ram chhung leh pawna industry lian tak takte nen an inzawm avangin zirlaite tan hamṭhatna tam tak a awm thu a sawi.

NIELIT, Aizawl hotute sawi danin, deemed to be university-a hlan kai an nih bakah central university ni tura buatsaih mek a ni a, chuvang chuan hmunhma lian zawk dinna tur ram acre 20 vela zau an mamawh a, zirna thar hawn belhna hmun tur ram âwl an nei mumal tawh lo. Ram mamawhna chu Mizoram sorkar hotute hnenah an thlen tawh a, an bawhzui mek a ni.

NIELIT, Aizawla zirna (course) pathum hawn tharte chu - B.Tech in Computer Science & Engineering (Artificial Inteligence & Machine Learning), M.Tech in Computer Science & Engineering (Artificial Inteligence & Machine Learning) leh, B.Tech in Electronics (Internet of Things) a ni a; academic session thar 2025-26 aṭanga kalpui tum niin, admission hawn mek a ni a, hemi atana affiliation pawh All India Council for Technical Education (AICTE) aṭangin an neih tawh bawk.