MZP-in HSSLC-a ti ṭhate chawimawi

Mizo Zirlai Pawl General Headquarters chuan nimin khan Vaivakawn Cultural Centre-ah Higher Secondary School Leaving Certificate (HSSLC) Examination 2025-a top 3-a lang Mizo zirlaite chawimawiin lawipuina an hlân a, minister PC Vanlalruata'n a hmanpui.

MZP hian HSSLC 2025-a Arts, Science leh Commerce stream-a top 3-a lang Mizo zirlaite an chawimawi a, mipa leh hmeichhia pali ve ve an ni. Lawmpuina atan thuchei, Rs 5,000 leh lehkhabu pahnih ṭheuh an hlan.

Minister PC Vanlalruata chuan, zirna chu mi puitlinga mite siamtu leh dinhmun ṭhaa dintirtu a nih thu a sawi a; zirlaite fuihna thu sawiin, "Ruihhlo a ni emaw, social media lam a ni emaw, eng kawngah pawh insûm theihna kan neih a ngai a, kan ram leh hnam kal zel tur hi tuna ṭhalaite leh zirlaite kutah kan awm," a ti a, ruihhlo laka fihlim tum tlat turin zirlaite a chah.

Fuihna thu sawitu Aizawl SP Rex Zarzoliana Vanchhawng pawhin ruihhlo chu ram hmelma a ni tih hria a, ti chhin miah lo tur te, ruihhlo laka fihlim tur leh do tlat turin a chah bawk.

MZP president H Lalthianghlima chuan, zirlai ti ṭha an chawimawi chhan chu exam-naa ti ṭha zual zingah Mizo a tam thei ang ber an lan theihna tura chona siamtu atan a nih thu a sawi. Inkhawm hi MZP vice president Dr C Lalremruata'n a kaihruai a ni.