Civil defence mock drill blackout District hrang hrangah neih a ni

India leh Pakistan inbeihna kal mekah boruak aṭanga beihna tawh palh pawha invenna leh chêt dan tur tihchhinna, air raid civil defence mock drill blackout chu tunlai hian district hrang hrangah buatsaih a ni. District khawpui tam zawkah neih a ni tawh a, zaninah Lunglei, Serchhip leh Saitualah buatsaih a ni ang.

Civil defence mock drill blackout hi Kolasib district-ah chuan Kolasib leh Vairengteah May 12, Thawhṭanni zan khan neih a ni. Zan dar 8:59-ah rálkhèl dár (siren) tihrîk a ni a, dar 9:00 - 9:04 chhungin êng tihthim a ni a, lirthei tlante pawh dintir a ni. Blackout hi mipuiin an zawm ṭhat thu sorkar thuchhuahin a tarlang.

Lawngtlaiah chuan May 13, Thawhlehni zan khan buatsaih a ni. Zan dar 7:59-ah rálkhèl dár tihrîk niin, dar 8:00 - 8:05 chhung kawlphetha tihtawp a ni a; mimalte'n an ina eng an neih dangte an tihthim bakah, khawlaia lirthei tlânte tidingin khâwl tihtawp a ni.

Mamit District Disaster Management Authority chuan Thawhlehni zan dar 8:30 khan an buatsaih a, minute 5 chhung hun hman a ni. Thuawih tura mipui inzirtirna a nih nghal avangin Mamitah hian Power & Electricity department-in khaw pum huapa power shutdown (kawlphetha tihtawp) a ni lo a, rálkhèl dár tihrîk veleh mipuiin an in ṭheuhah êng an tithim a ni. Ruahmanna hi mipuiin an zawm ṭha niin sorkar thuchhuahin a tarlang.

Khawzawlah pawh Thawhlehni zan dar 8:30 khan civil defence mock drill blackout hun hman a ni a; Bawrhsap pisa aṭanga rálkhêl dár tihrîk a nih hnuah Power & Electricity department-in Khawzawl pumpuiah kawlphetha an titawp a, mipuiin êng an neih dangte an tithim bawk. Blackout hian minute 5 chhung a awh a; Khawzawl DDMA-in an endik a, drone hmangin chung lam aṭangin endik a ni bawk.

Hnahthialah chuan Thawhlehni zan dar 6:55 - 7:00 inkar khan Hnahthial khawpui huam chhungah blackout kalpui a ni a; Power & Electricity department-in Hnahthial pum puiah kawlphetha an titawp a, mipuiin êng dangte an tithim a ni.

Champhai khawpuiah chuan DDMA ruahman angin nizan khan dar 9:00 - 9:05 inkarah civil defence blackout hun hman a ni a; râlkhêl dâr tihrîk veleh eng chi hrang hrangte tihtawp a ni.

Zanin hian Lunglei, Serchhip leh Saitualah chuan an district-a DDMA-te bultumin civil defence mock drill neih a ni ve leh dawn. Lungleiah chuan zan dar 8:30 - 8:35 hun hman a ni ang a, Serchhipah pawh zan dar 8:29-ah ralkhel dar tihrik tur niin, dar 8:30 - 8:35 chhung êng tihthim a ni ang. Saitualah chuan zan dar 6:30 - 6:33 chhung hun hman tur a ni.

Saitualah hian May 16, Zirtawpni chhun dar 11 aṭangin town area-ah civil defence mock drill buatsaih tum a ni bawk.

Air raid civil defence mock drill leh blackout hi Aizawlah chuan May 7, 2025 khan chhun leh zanah neih a ni a, sorkar ngenna leh hriattirna mipuiin an zâwm ṭha lo.

Sorkar thuchhuaha tarlan danin, rîkrum thil a awm chuan rálkhêl dár (siren) hi second 90 chhungin second 15 chhung tihrika second 5 chhung tihtawp zel ṭhin a ni.