Ngaizela lung tla tur vênna siam nan cheng vbc 90 vel a ṭul tura ngaih a ni

May 12 & 13-a Lengpui Pûkpui khâm, Ngaizel khâm leh Hlimen quarry enfiahtu mithiamte chu nimin khan chief minister Lalduhoma nen an inkâwm. Ngaizel khâm aṭanga lung tla ṭhin avanga chhiatna thleng ṭhin vênna atan cheng vbc 90 vel a ṭul dawna ngaih a ni a; Lengpui dai Pûkpui khâma ko chhawrdawh chu hâl darh (blasting) a ṭhaa ngaih a ni.

CM Lalduhoma hian a pisaah Mizoram sorkarin lung tlak hlauhawmna hmun­te endik tura a chah chhuah Council of Scientific & Industrial Research - Central Institute of Mining & Fuel Research-a chief scientist Dr C Sawmliana leh Maccaferri Geo-technical Solutions senior manager Manthan Chauhan te hmun an enfiah chungchang a sawipui.

Mithiamte chuan, Lengpui Pukpui khâma ko chhawrdawh (benching) chu hâl darh ṭhain an hria a; a chung lama ram neitute pawhin mipui himna atan an ramte an pek phal mai an beisei thu CM an hrilh.

Ngaizela chhiatna thleng ṭhin chu kawng chhak lam ko hnaiha lirthei awm leh tlânte chungah a thleng deuh zel tih sawiin mithiamte chuan, kawng chu zau thawkhat mah se, a thlang lam sirah city bus dah a ni a, lirtheia tlân tlang turte kawng chhak lam hnaiha an tlân a ṭul phah ṭhin avangin tihdanglam a ṭula a lan thu an tarlang.

Ngaizel khâma lung tla ṭhin venna rintlak tak, khuarei daih ni thei tur siam tur chuan cheng vbc. 90 vel a ṭul dawna an ngaih thu an sawi a; Hlimen lama hmalak dan tur ṭha nia an hriatte pawh Chief Minister an hrilh a ni.

CM Lalduhoma chuan, Lengpui Pukpui bul ko hlauhawm siamremna tur leh Ngaizel lung tla vanga chhiatna thleng pumpelhna tur siam nan detailed project report ṭha tak siam vat ṭha a tih thu a sawi a; CSIR-CMIR nena ṭang dunin a ṭul anga IIT lam mithiamte pawh râwnin, DPR siam phawt a ṭul thu a sawi bawk.