Taxi intlan chhawk vangin Aizawl traffic jam a ziaawm - Traffic SP
September 1, 2016 aṭanga ṭanin Aizawla taxi 3,526 awm mekte chu hlawm thum A, B leh C-ah ṭhenin intlan chhawk tir an ni a, taxi-ah sticker bel tir vek niin ni tin hlawm khat zel chawlhtir an ni. Aizawl traffic jam nasa tih ziaawm nana hmalakna hian Aizawl traffic tawt lutuk nasa taka a chhawk thu Traffic SP C. Lalthanmawia chuan Vanglaini palai a hrilh.
C. Lalthanmawia chuan, "Vawi leh khata traffic jam tihtawp chu thil theih loh tluk a ni a, mah se a zualpui hi chu kan tiziain ka hria. Taxi tlan chhuak an tlem hian traffic jam rei leh nghet lutuk ṭhin ang kha a tibo a, hei ringawt pawh hi a thawventhlak a ni," a ti.
Traffic SP chuan nitin office kal
ṭhinte pawn an ziaawm phah tih sawiin, "Office kal ṭhinte pawhin taxi intlan chhawk hnuah traffic jam a ziaawm thu leh a hahdamthlak thu min hrilh. Taxi intlan chhawk kan tih hian tun hmaa stand mumal neih loh vanga a ruaka tlan kual reng ṭhinte pawh kha an awm tawh lo," tiin traffic jam thlen theihna tam tak an pumpelh tih a sawi.
Aizawl traffic jam tihziaawm nan hian private motor-te chu registration number-a a tâwp ber ang zelin calendar-a ni zat tawpna number-ah tlan chhuak lo tura rawtna neih a ni. Motor no. 1-a tawp chu calendar-a ni 1, 11, 21, leh 31-ahte an tlan chhuak thei lo ang a, motor no. 2-a tawp chu ni 2, 12 leh 22-ahte an tlan chhuak thei lo ang.
Traffic SP chuan, "Traffic Management Coordination Committee lamin meeting an koh leh hunah registrationn number-a a tâwp ber ang zela intlan chhawk pawh hi la ngaihtuah leh tur a ni," tiin an hmachhawp chungchang a sawi.
Taxi-a sticker bel tura tih chu taxi 3549 in an lam tawh a, Aizawla taxi awmzat a tira an chhinchhiah 3,526 aia tamin an lam nachhan hi Traffic SP chuan Lengpui taxi an pek tel vang a nih thu a sawi.
C. Lalthanmawia chuan, "Lengpuiah khuan taxi 36 vel an awm a, anni hi sticker 'LP' tih chuanna pek an ni. Aiport aṭanga mi an phurhin Aizawl rawn tlan luh a ngai ṭhin a, chumi atan chuan sticker hi pek ve an ngai a ni," a ti a, taxi zingah document felfai lo, insurance policy leh tax pe lo tan sticker lam theih loh a nih avangin taxi tam takin document an neih ṭhat phah tih a sawi bawk.
September 30-a Home minister R Lalzirliana'n a hawn, Traffic Jam Free Aizawl City Programme-a hmalak a nih dan Traffic SP chuan a sawi nghal a, he programme hnuaiah hian Aizawla lirthei nei zawng zawngte chu ni 426 chhungin garage nei vek tura tih an ni dawn a, thla khat danah garage nei lote chu hriattirna pek thar zel tum niin kum 3/4 chhungin Aizawl chu traffic jam awm lohna khawpuiah siam tum a ni.
Traffic SP chuan, "Duh angin chak takin hma a la lak theih loh a, nakkum April chho aṭang chuan na zawka hma lak a ni ang. Garage nei vek tura tih hi chu Transport deparment kut a ni a, anni lamin public notice-te chhuahin hmalak a ni dawn a ni. Mizoram vehicle rules-ah pawh motor neite chu garage nei ngei ngei tura tih an ni a, dan pawh khauh zawkin kan keng kawh dawn. Zana kawngpui dunga motor riah mai mai chi ang te kha a bo dawn a ni," a ti a, an hmalakna hlawhtling tur chuan transport department, Aizawl Municipal Council te nen ṭha taka an thawh ho a ṭul tur thu a sawi.