MUHCS-ah inziak lut an tam chho zel - Health Minister

Health minister Lalrinpuii chuan, Mizoram Universal Healthcare Scheme (MUHCS) chu mipui huap zo leh chhungkaw harsa tak takte'n an ṭangkaipui a nih avangin inziak lut an tam chho zel tih a sawi.

Lalrinpuii hian nimin khan Bûkpui Primary Health Centre a tlawh a; thu sawiin, "MUHCS hi sorkarin mipui tana a duan a nih ang leh mi zawng zawng huap zo leh chhungkaw harsa tak takte pawhin an ṭangkaipui em avangin in register an tam chho zel a ni," a ti.

Damdawi-in zingah a tir lama MUHCS zawm lote pawhin an zawm chhoh zel thu leh la zawm lote nen pawh inbiak chhoh zel a nih thu sawiin Lalrinpuii chuan, "A ṭhen chuan rawn zawm tharin, tun dinhmunah inbiakna neihpui mekte pawh an awm. Mi tinin he healthcare scheme ṭangkai tak hi an zawm ngei chu duhthusam a ni," a ti a; MUHCS chu mi harsa zual te, pensioner te, golden card-a chuang lo leh sorkar hnathawk ni lote'n an ṭangkaipui zual thu a sawi.

Health Minister chuan, MUHCS-ah inziak lut vek tura mipui a chah bakah, damdawi-ina thawkte chu anmahni pantute an inziak lut tura lo hrilh zel turin a chah a; khawtlang hruaitute pawh an khawtlang mipuite an inziah luh vek theih nan ṭan la tur leh, inziah luhna tura sum pek ngai nei lo an awm pawhin an bialtu MLA-te hnenah thlen hreh lo turin a chah bawk.

Minister Lalrinpuii hian nimin vek khan Serkhan, Lungmuat, Nisapui leh North Chaltlang khuaa health and wellness centre-te a tlawh bawk a; thawktute nen inkâwmin, an harsatna leh mamawhte an sawiho a ni.

Lalrinpuii chuan, PHC leh health & wellness centre-a thawkte chu an thawhna dinhmun leh an tlakchhamte hre chiang turin a chah a; damlote tan hmun hla tak tak pan ngai loa an awm theih nan doctor leh thawktute dinhmun a hmun ngeia en a, thuam thar zel tum a nih thu a sawi.