Hlawhtling zel turin taimak, tumruh leh tawrhchhel a ngai - Prof. Lalnilawma

Aizawl Christian Academy, Kelsih chuan nimin khan an hmunah kumin HSLC leh HSSLC-a an zirlai hlawhtlingte pualin Graduation Ceremony vawi lina an buatsaih a; khuallian, minister of state Prof. Lalnilawma chuan, hlawhtling zel turin taimak, tumruh leh tawrhchhel a ngaih thu a sawi.

Prof. Lalnilawma chuan, zirlai hlawhtlingte chu a lawmpui thu a sawi rualin, hmabak an la ngah thu a sawi a, "Hlawhtlin zel in la mamawh a, hlawhtling zel turin taimak, tumruh leh tawrhchhel a ngai. Hlawhtlinna kal kawng hi a namailo a, kawng bumboh leh harsatnate hmachhawn a ṭul a, chungte hmachhawn tur chuan rilru in lo buatsaih lâwk a ngai a ni," a ti.

Khawvela dam khawchhuak turin beidawn duh lohna rilru put a ngaih thu sawiin Lalnilawma chuan, "Kan hmaa thil awm apiangte a harsatna leh a hrehawmna lam tur ngaihtuah loin, a êng lam zawng a kan thlir thiam a ngai," a ti a; thil rêng rêngah a theih lohna lam aiin, a theihna lam ngaihtuah a ṭul thu a sawi.

Aizawl Christian Academy hi kum 2021 khan din a ni a, kumin HSLC-ah zirlai panga leh HSSLC-ah zirlai 22 neiin, an hlawhtling vek a ni.