Mithiamte'n Pûkpui khâm an enfiah

Aizawl District Disaster Management Authority (DDMA) chairman Lalhriatpuia, Aizawl bawrhsap leh mithiamte'n Lengpui dái Pukpuia kawng chhak lama lung tlak hlauhawmna an enfiah a; vawiinah Ngaizel khâm leh Hlimen quarry leh tlangte an enfiah leh dawn.

Lengpui Pukpui khâm, Ngaizel khâm, Hlimen leh hmun dangte endik turin Council of Scientific & Industrial Research - Central Institute of Mining & Fuel Research (CSIR-CMIR)-a chief scientist Dr C Sawmliana leh Maccaferri Geo-technical Solutions senior manager Manthan Chauhan te chah chhuah an ni a; nimin khan an rawn thleng.

Mithiam chah chhuahte nen hian nimin khan Lengpui Pukpui enfiahna nghal a ni a; Aizawl DDMA hotu te, PWD, Disaster Management & Rehabilitation department leh Geology & Mining department aiawh te, Mizoram University-a geologist te, Lengpui VC leh YMA hruaitute an tel.

Mithiamte hian Lengpui Pûkpui, Ngaizel kham leh Hlimena lung tlak ṭhinna hmun leh hmun dang him lo laite an enfiahna aṭangin mipui tana him zawk siam dan tur an ruahhman dawn a ni.

Maccaferri hi Italy company niin, kum 1879-ah din a ni a, tunlaia leimin dâwlna atana hman lâr tak 'gabion wall’ hi kum 1893-a an hmuh chhuah a ni.