MLA-te'n zirlai lawmpuina an hlan

Aizawl North-III bialtu MLA K Sapdanga, minister chuan nimin khan a bial chhunga HSLC 2025-a top 10-a langte an inah kal chilhin chawimawina leh lawmpuina a hlan.

K Sapdanga'n chawimawina a hlante chu HSLC 2025-a pariatna Lalruatkimi Khiangte d/o Lalhmingthanga, Chanmari leh pariatna Harry Lalruatfela s/o Lalrinchhana, Chanmari West an ni a; Rs 10,000 leh lawmpuina thuchei a hlan a ni.

Minister K Sapdanga chuan, a bial chhungah HSLC-a ti ṭha chawimawi tur an nei chu a lawm thu a sawi a, "Hlawhtlinna sang zawk in chan theih nan ṭang sauh sauh turin kan beisei tlat che u," tiin, an kal zelna turah duhsakna a hlan.

Lunglei West bialtu MLA T Lalhlimpuia pawhin nimin khan HSSLC 2025 top 10-a Lunglei district aṭanga lang mi pahnih, a bial chhung mi ve ve hnenah lawmpuina a hlan.

Lawmpuina hlanna inkhawm hi Lunglei Venglaia 'Ka Ṭhiante In' ah buatsaih a ni a; MLA hian HSSLC 2025 Science-a palina Gabriel Lalrinpuia leh Arts-a 10-na Rosy Lalchhandami, Lunglei Venglai mi ve ve hnenah T Lalhlimpuia'n lawmpuina atan laptop leh thuchei a hlan a ni.

T Lalhlimpuia chuan, Lungleiin theihna sang tak an neih thu sawiin, "Kan zirlai chhuanawmte pawhin theihna an nei tih hria se. Mi hlawhtlingte hian sacrifice an ngah hle ṭhin a, chu chu paltlangin hlawhtlinna an chang ṭhin," a ti a, zirlai an chawimawite chu inpumpekna nen bei zel turin a chah.

Lunglei West MLA hian 23rd Asian Arm Wrestling Championship-a kg. 60 huanga champion Reuben Lalhmangaihzuala, Lunglei College Veng hnenah nimin tlai khan lawmpuina Rs 30,000 leh thuchei a hlan bawk.