2025-ah ASF vangin vawk 5,051 thi tawh

Vawk pùl hri, African Swine Fever (ASF) vangin kumin 2025-ah nimin thleng khan Mizorama district paliah vawk 3,883 a thi tawh a, vawk 1,168 suat tawh niin, kumina vawk thi tawh zat chu 5,051 a ni.

Animal Husbandry & Veterinary (AH&Vety) department-in report a dawn chinah, kumin 2025 bikah March thla laihâwl vel aṭangin ASF vangin vawk a thi ṭan a; nimin thleng khan Lunglei, Siaha, Lawngtlai leh Mamit district-a khua/veng 53-ah ASF a lêng tih finfiah a ni tawh.

Kumin bika ASF tuar na ber Siaha district-ah hri lenna khua/veng 29 awmin, ASF vangin vawk 2,278 a thi tawh a, hri leng zel tur ven nan vawk 756 suat a ni tawh. Siaha district hi hri lenna hmun bakah hri vanga vawk thi leh suat tam berna a ni mek.

Mizoramah kum 2021-a ASF a lên tirh aṭanga nimin thlenga vawk thi leh suat zat chu hriat theih chinah 1,16,515 a ni a; vawk thi leh suat tam ber kum chu 2021 kha niin, hemi kum hian hri vanga thi 33,417 leh suat 12,568, a vaiin 45,985 a awm a ni.

ASF: MIZORAM DINHMUN

(March - May 12, 2025)

District ASF Vawk Vawk

Lenna Thi Suat

Siaha 29 2,278 756

Lawngtlai 16 1,337 315

Mamit 3 173 48

Lunglei 5 73 48

TOTAL 53 3,883 1,168