KHAWTHLIR

Sorkarin ruat

Mizoram sorkar chuan Border Road Organisation joint director aṭanga pension Chalhming Thanga, Falkland Veng chu Mizoram Resource Mobilizatton Committee member atan a ruat.

Aptitude challenge

YMA, Ramthar Veng Branch, Aizawl chuan an venga zirlaite tan nimin khan St. Lawrence School-ah Aptitude Challenge Examination an buatsaih. Exam hi zirna sang an hmachhawnna tur te, hna zawnna lama hma an sawn theih nan leh hmangchang an hriat theihna tura buatsaih a ni a; zirlai 312 telin, an pawl zat azirin hlawm hrang hrangah an ṭhen a, aptitude, reasoning, general knowledge leh english-ahte exam buatsaih a ni. Zirlai ti ṭhate tan lawmman ṭha tak an siam bawk.

Pure water fountain

Lunglei Chanmari thlanmuala gate siam thar leh pure water fountain dah thar bakah, Lunglei Park-a pure water fountain dah thar chu nimin khan bialtu councillor K Lalrinawma'n a hawng. Thlanmual gate siam leh pure water fountain dah hi LMC Ward-VII bialtu K Lalrinawma LMC Urban Local Body grant 2023-24 aṭanga siam leh dah a ni.

MZP-in scho' bawhzui  turin Larsap ngen

MZP General Headquarters chuan Mizoram sorkarin sorkar laipui aṭanga scholarship fourth instalment a dawn thuai theih nana hma lakpui turin nimin khan Governor Gen. VK Singh an ngen. MZP hian Delhi-a chám mek Governor hnenah lehkha an thawn a; Mizoram sorkarin scholarship sum a hmuh belh thuai theih nan leh Mizo zirlaite hnenah pek thuai a nih theih nan Ministry of Tribal Affairs hotute nawr turin an ngen a ni. MZP tarlan danin, kum 2023-24 ah Mizoram sorkar kaltlanga tribal scholarship diltu zirlai 31,685 an awm a, zirlai 26,909-in an dawng tawh a, zirlai 4,027-in an la dawng lo thung.