MUHCS mipui tan a him - Health Minister

Health & Family Welfare minister Lalrinpuii chuan May 10, Inrinni khan Mamitah a department enkawl hrang hrang pisate tlawh a; Mizoram Universal Healthcare Scheme (MUHCS) chu mipui tana him thu a sawi.

Lalrinpuii hian Mamit District Hospital-a thawktute hmaah thu sawiin, "Mizoram mipuite hamṭhatna tura sorkarin a duan MUHCS hi a ṭangkaina zir chiana inziah luh vek tur a ni. A pawimawhna leh ṭangkaina la hre lo kan chhehvela a mite pawh hrilhhretu ni ila, he scheme hi mipuite tan a himin, dam loh nikhuaah a ṭha em em a ni," a ti.

Sorkar damdawi-in tichaka tichangtlung turin nasa takin hmalak mek zel a ni tih sawiin Lalrinpuii chuan, "Mamit District Hospital mamawh leh hmasawnna tur atana hmachhawpte pawh ngaihtuah zel a ni dawn," a ti a; indaih lohna chhuanlama hmang mai lo a, taima leh rinawm taka mahni hna thawk turin a chah.

Health Minister chuan, damlote'n sorkar damdawi-in aia mimal damdawi-in pan an châkna chhan chu nursing care a ni ṭhin tih sawiin, "Hei hi a pawiin a veiawm em em a, sorkar damdawi-inah hian kan kalpui ve thei a ni. Doctor zaidam leh fel tak chu a ṭawngkam ringawt pawh damlote tana damna thlentu a ni thei," a ti.

Mamit District Hospital medical superintendent Dr Lalrinfela sawi danin, mamit DIstrict Hospital-ah hian thawktu 108 an awm mek a ni.