Thil man tito lo turin ngen

Lunglei District Disaster Management Authority (DDMA) chief executive officer Rochuangkimi Khenglawt chuan mipui ngenna tichhuakin, India leh Pakistan inkar boruak inmung mek vanga thil man tito lo turin dawrkaite a ngen.

Rochuangkima Khenglawt chuan, sorkarin ni tin mamawh ei leh bar, petrol/diesel, eirawngbawlna gas a khaihlak loh nan theihtawp a chhuah reng tih a tarlang a, "Mipui pawh chiai vanga mahni mamawh bak thil lei leh chhêk khawl chiam lo turin kan inngen a ni," a ti.

Lunglei DDMA CEO chuan, social media-ah thuthang dik lo leh belhchian dâwl lo lêng vel a tam thu tarlangin, "Kan thu hmuhte a dik ngei tih finfiah hma chu awih ngawt loh tur a ni a, sorkar aṭanga official-a thuchhuah chauh rin tur a ni," a ti a; sorkar laipuiin India sipaite veivahna leh chet velna thlalak, video leh news anga vawrh darh a khapna chu zâwm turin a ngen bawk.