District khawpui hrang hrangah defence mock drill buatsaih dawn

India leh Pakistan inkar buaina vanga chhiatna thleng palh thei laka mipui himna tur ngaihtuahin May 10, Inrinni khan Siaha, Kolasib leh Lawngtlai district hotute chu an ṭhukhawm a; May 9, 2025 khan Lunglei leh Khawzawlah district hotute an ṭhukhawm tawh bawk. Khawpui hrang hrangah civil defence mock drill buatsaih a ni dawn.

District hotute chuan, India leh Pakistan inkara buaina thleng mekah chî-âi lo tur leh sorkar thupek ngaichâng ṭhin turin mipui an ngen a; chhiatna a thlen palha inhmakhua lâwkna tura pawimawhte an sawiho bakah, rîkrum thila sorkara thuneitute biak theihna tur phone number an tarlang.

Civil defence mock drill hi Lungleiah chuan May 15, 2025 chawhma dar 11-ah neih a ni dawn a, zanah minute 5 chhung a ruala khawpui chhunga eng tihthim (blackout exercise) neih a ni ang.

Siahaah chuan May 10, Inrinni zan dar 8:30 khan minute 5 chhung blackout neih a ni a; Siaha khawpuia VC tinte'n blackout chhungin information centre aṭangin siren an tiri a ni.

Kolasib leh Vairengteah chuan May 12, vawiin hian air raid mock drill neih a ni dawn a; zan dar 8:59-ah siren tihrik a ni ang a, dar 9:00 - 9:04 chhung blackout a ni ang.

Mamit leh Khawzawlah chuan May 13, 2025 zan dar 8:30 khian civil defence mock drill neih tura ruahman a ni a; zan dar 8:30-ah DC office aṭangin minute 5 chhung siren tih rik a ni ang a, eng tihthim a ni ang. Hnahthialah pawh May 13, 2025 zan dar 6:55 - 7:00 inkarah blackout neih a ni dawn bawk.