Aizawlah Rongali Bihu lawm

May 10, Inrinni khan Berawtlang Multipurpose Cultural Complex-ah Assamese-te kût pui ber Rongali Bihu lawm a ni a, Assembly speaker Lalbiakzama'n a hmanpui.

Rongali Bihu hi Bohag Bihu tih nen a thuhmun a ni a, Assamese-te tan chuan an buh seng hun a ni ṭhin a, kum bul chhiar ṭanna atan an hmang bawk.

Speaker Lalbiakzama chuan, Mizorama Assamese-te chu kût chibai a bûk a, "Hmarchhak unau pasarihte inlungrualna leh inpumkhatna atan Assam hi a pawimawh. Rongali Bihu hi Assamese-te tana kumthar lawmna, buh seng lawmna hun leh inpumkhatna kût a ni a, he kût kaltlang hian Assamese unaute hmarchhak unau pasarihte inpumkhatna atan hmahruaitu ni turin ka sâwm a ni," a ti.

Mizoramah chuan kût pawimawh pathum - Chapchar Kût, Mím Kût leh Páwl Kût te ropui taka lawm ṭhin a nih thu sawiin Speaker chuan, "Bihu leh Chapchar Kût phei chu agriculture lam kaihhnawih a ni a, a hun dang hret mah se, a inzûl thawkhat niin ka hria," a ti a; Mizoramin kût a lawmnaah tel ve ṭhin turin te Assamese-te leh hmarchhaka hnam dangte a sáwm a ni.