Jail-a táng tawhte pualin hun hmang

Synod Prison Ministry chuan May 10, Inrinni khan Tuikual Kohhran Hall-ah jail-a táng tawhte pualin hun an hmang a, Excise & narcotics minister Lalnghinglova Hmar-in a hmanpui. Jail-a táng tawh mi 51 an tel a, Prison Ministry-a thawkte leh mi dang eng emaw zatin an chhim bawk.

Ex-Prison Inmates Follow-up Programme vawi 5-na hi Synod Prison Ministry director Rev. Lalhleia'n a kaihruai a; minister Lalnghinglova Hmar chuan, Sam ziaktuin nun beidawnna leh lungngaihna a paltlang hnuah Pathianah beiseina a neih thar thu sawiin, Pathianah beiseina nghat thlat turin jail-a táng tawhte chu a fuih a; kut themthiam takte an nih avangin hma lam pan zel turin a chah bawk.

Jail-a táng tawhte aiawhin Lalramnghinglova, Khawngaihna in dintuin thu a sawi a, thla 9 chhung Central Jail-ah a tán a, jail-a luhpui loh Isua Krista chu jail aṭanga a chhuahpui thu a sawi.

Chawhnu lamah Chawlhhmun bialtu pastor Rev. Malsawmtluanga'n thu a sawi a, jail-a tang tawhte'n sharing hun an hmang bawk.

Synod Prison Ministry hi January 2016 khan din a ni a, April 2025 - March 2026 chhung atan counsellor pakua an ruai mek. Kum 2023 aṭang khan aṭangin kum tin Ex-Prison Inmates Follow-up Programme vawi hnih an buatsaih ṭhin.

Inspector General of Prison phalna angin Central Jail (Mizo leh Masihi Sangati), Central Women Jail, leh district jail hrang hrangah inkhawm an buatsaih ṭhin a, Krismas leh kumthar lawmna ruai an ṭhehpui ṭhin. Jail hrang hrangah counselling an buatsaih ṭhin bakah, Bible Ràlchhàn an buatsaih ṭhin bawk.