MSDE Secy leh LESDE Minister inkâwm

Sorkar laipuia Skill Development and Entrepreneurship (MSDE) secretary Atul Kumar Tiwari chuan May 10, Inrinni khan Industrial Training Institute (ITI), Aizawl a tlawh a; nimin khan Labour, Employment, Skill Development and Entrepreneurship (LESDE) minister Lalnghinglova Hmar nen an inkâwm.

Aizawl Peak Restaurant-ah inkawmnaah Lalnghinglova Hmar chuan, MSDE Secretary-in Mizoram a tlawh chuan hmasawnna a thlen a beisei thu a sawi a; sorkar laipuiin ITI tihchangtlunna tur sum ṭhahnem tak a dah chu Mizoramin a chhawr theih nan remchang siamsak tur leh, infiamna leh kut themthiamna lam ṭhuikhawm tura Mizoram sorkar rawtna thehluh tawh chu pawmsak turin a ngen.

Atul Kumar Tiwari chuan, Mizoram LESDE department tih tak takna leh hmasawn duhna a hmu tih sawiin, "ITI-a zir mekte'n an hmanraw neihte ṭha tawk lo mah se, thiam duhna tak tak an neiin ka hria a, sorkar laipui aṭanga puih theihna awm angte ka lo ngaihtuah ang," a ti a; sorkar laipuiin kut themthiamna tihhmasawnna tura scheme a neihte leh a kalpui mekte zir chiang tura Delhi-a kal turin LESDE department hotute a chah.

Inkawmna hi LESDE secretary Lalmalsawma Pachuau-in a kaihruai a; LESDE department, Mizoram Youth Commission leh Mizoram State Sports Council hotute'n an hmalakna leh hmachhawpte an tarlang.

MSDE Secretary hian Inrinni khan Aizawl ITI a tlawh a, Aizawla a chàm chhungin NIT Mizoram, NIELIT, PMKVY hnuaia skill training centre te, Thenzawl Handloom Centre te a tlawh bawk.