KHAWTHLIR

Eletric bill tlai

Power & Electricity department chuan thuchhuah siamin, electric bill siamna khawl (software) thar hman ṭan a nih avangin Aizawl, Lunglei, Serchhip, Khawzawl, Champhai, Lawngtlai, Siaha, Saitual leh Kolasib-ah mipuiin electric bill an dawng tlai deuh dawn tih an tarlang. Online-a bill pe turte tan consumer number thar (digit 10) hman tawh tur a nih thu leh, PEDM Consumer app aṭangin bill pek theih a nih thu an tarlang bawk.

India sipai chêtna tihdarh khap

Ministry of Home Affairs hnuaia Internal Security Division chuan thupek chhuahin, India leh Pakistan inkar boruak ṭha lo chungchanga India sipaite veivahna leh chet velna thlalak leh video-te news anga media leh social media-a vawrh darh khap a nih thu a tarlang.

Traffic jam

Traffic SP Stephen Lalrinawma chuan hriattirna chhuahin, Bawngkawn aṭangin Ramhlun Tlaklui kawngah LMV leh a aia liante zing dar 8:30 - 10:00 inkarah tlan phal a nih dawnloh thu a tarlang. Traffic SP tarlan danin, ruahmanna hi May 13, 2025 aṭangin hman chhin tur a ni a; Bawngkawna zing lama traffic jam tihziaawmna tura tih a ni.

Election sawiho

Election Commission of India principal secretary NT Bhutia chuan Mizorama ni hnih châm turin nimin khan Aizawl rawn thleng. NT Bhutia ho hian Directorate of Election-ah Election hotute nen Election department tihhmasawn leh tihchangtlung a nih theih nana mamawh te, inthlan kaihhnawihaa ruahmannate ECI duh dan anga felfai taka kalpui a nih theih dan turte nimin khan sawiho a ni.

A thlawna inentirna

International Nurses Week (May 6-12) pualin College of Nursing, Regional Institute of Paramedical and Nursing Sciences (RIPANS) leh Millennium Center Development Authority chuan nimin khan Millennium Centre-ah hriselna dinhmun a thlawna enfiahna (free health check-up) an buatsaih. Hriselna lama inzirtirna te, BMI, blood pressure leh zunthlum endiknate buatsaih niin, mi eng emaw zat an inentir a ni.