Ram leilung fa ni lo two wheeler khalhte ATTA-in dap chhuah tum

Aizawl Two Wheeler Taxi Association (A???) chuan thuchhuah siamin, Aizawla two wheeler taxi khalh zingah hnam dang leh ram leilung fa ni lo an awm leh awm loh an dap chhuah dawn thu an tarlang a; an hmalakna thlâwp turin sorkar thuneitute leh mipui an ngen.

ATTA chuan, kumina an pawl inkhawmpuiah, 'Ram leilung fate'n kan chanvo kan humhim zelna turin hnam dang two wheeler taxi khalh an awm leh awm loh dap chhuah ni se' tia an rel thu leh, an rorel chu bawhzui an tum thu an tarlang.

Two wheeler taxi khalha eizawnnaah ram leilung fa ni lote'n an eizawnna an ṭâwmpui ṭha an ti lo tih sawiin ATTA chuan, "Hnam dang leh ram dang mi, ram leilung fa ni lo, voter ID leh Aadhaar card pawh nei lote'n he eizawnna an lo kalpui ve hi kan duh lo a, India khua leh tui zingah pawh hnam dang ILP neite chu ILP-in a phût ang ni loa two wheeler taxi khalh an awm a nih chuan thuneitu hnenah thlen zel kan tum," an ti.

ATTA chuan, an hma-laknaah thlawpna ngenin, "Nakin zelah kan ram tan a ni tih min hriatsak a, ram leilung fa ni lo hetiang eizawnna lo kalpuia hlâwkna lo tél kan hriat chuan a rang lama thuneitute hnenah emaw, ATTA hruaitute hnenah hriattir turin kan inngen a ni," an ti a; two wheeler taxi neitute chu ram leilung fate ngei khalhtir ṭhin turin an ngen.

Lirthei tihral tumte pawh an mi hriat chian, ram leilung fate hnenah ngei tiral ṭhin tur leh hnam dang hriat chian lohte hnenah an lirtheite hralh lo turin an ngen bawk.