Civil Defence Mock Drill thlir lêt a ni

India leh Pakistan inkar ṭha lo vanga indona a thlen palha inrálrin dan tur tihchhinna, Civil Defence Mock Drill, May 7, Nilainia Aizawla neih chu nimin khan Chief Secretary conference hall-ah thlir let a ni a; zan lama black out hun hman chu mipuiin an zawm ṭhat tawk loh thu sawi a ni.

Thlir letna hi chief secretary Khilli Ram Meena-a'n a kaihruai a, IGP Anil Shukla bakah, district tina DC leh SP-te an tel a, ṭhenkhat chuan video conferencing kaltlangin an chhim. Aizawl bawrhsap Lalhriatpuia'n Aizawla Civil Defence Mock Drill kalpui dan a sawi a; DC dangte'n an district ṭheuha vital installation an neih an tarlang.

Ṭhutkhawma telte chuan an hmuh dan hrang hrang an sawi a; êng zawng zawng tihthimna, black out chu mipuiin an zawm ṭhat tâwk loh thu leh beisei a phak loh deuh thu sawi.

Khilli Ram Meena chuan, indo a nih pawha chhiatna nasa thleng thei laka lo inven dan tur emaw, tawrh nêp dan tur emaw chu tun aṭanga ruahmanna felfai tak siama inpuahchah a ngaih thu a sawi a, "State leh district level-ah advisory committee din a ṭul a, district tinah satellite phone pahnih ṭheuh tal neih a ṭul," a ti a; DC-te chu an district ṭheuhah civil defence mock drill buatsaih ve turin a chah.

Hot line mamawhna te, thingtlang kilkhawr zawka awmte'n information an dawn theih nan Akashvani (radio) hman ṭangkai thiam a ṭul thute sawiin Chief Secretary chuan, "Indona a lo thlena black out pawimawhzia mipuite'n an hriat chian hle a ngai a, a bik takin zirlai naupangte zingah awareness campaign ngawrh taka kalpui a ṭul," a ti.