Assembly Opposition Leader-in mahni ram inpe lo turin VC-te chah

SIRD-PR chuan nimin khan Durtlang Leitana an hmunah Darlawn RD block chhunga village council member-te pual 'Interaction session' an buatsaih a, opposition leader Lalchhandama Ralte-in hmanpuiin, VC member-te chu anmahni ram inpe lo turin a chah.

Lalchhandama Ralte chuan, VC member-te chu duham lo tura chahin, "Mahni leh mahni ram inpek loh tur. Nakin lawkah ṭhangtharte'n in thlân an la rawn hâi duh mai ang," a ti a; ram pekah fimkhur tur leh hmasawnna ngai pawimawh turin a fuih.

Hmar tlangdung chu Mizoram kawtchhuah a ni dawn tih sawiin Lalchhandama chuan, "National high pahnihin min paltlang dawn. Hmar tlangdung landlock tia sawin ṭhin chu tunah hian road alignment tih mek a ni a, compensation kalpui chhunzawm tur a ni," a ti.

Opposition Leader chuan, VC-te chu sorkar hmasaah thuneihna pek belh an nih thu leh chhiah lak kawngah thuam chak an nih thu sawiin, "Central ministry hnuaia Panchayati Raj model mil zela tihchangtlun chhoh a ni," a ti a; tun hnaia HSLC leh HSSLC result chhuakah hmar tlangdung an tlahniam hret tih sawiin, ṭan la turin a fuih.

Lalchhandama Ralte chuan, healthcare scheme-a inziak lut turin Tuivawl bial mipui a ngen a, "MLA leh VC-te buaina pui ber pakhat chu damlote inenkawlna senso phuhrûksak a ni," a ti a; a bial chhunga VC-te chu inkhawmpui lian hrang hrang thleng tura inbuatsaih tur te, faina leh intodelhna kawngah hmasawn tum turtein a chah.

Interaction session hi SIRD-PR associate professor Dr. Malsawmdawngliani Fanai-in a kaihruai a; core faculty Dr Lalhruaitluangi Sailo-in thil pawimawhte a zirtir. Sawihona leh zawhna leh chhanna hun hman a ni bawk.