CM-in Vantawng CLF CMTC a hawng

Chief minister Lalduhoma chuan nimin khan a bial chhung Thenzawlah Mizoram State Rural Livelihoods Mission (MzSRLM) hnuaia din 'Vantawng CLF Community Managed Training Centre' a hawng.

CM Lalduhoma chuan, Mizorama Community Managed Training Centre hmasa ber hawn a ni tih sawiin, "Ka biala bul min ṭan sak avangin Rural Development Minister leh MzSRLM thuneitute chungah lawmthu ka sawi. Ka bial a nih vanga duhsak satliah in ni loin ka hria a, kan SHG ho nen hian ka office-ah kan inhmu tawh a, an thil siam chhuahte min hmuhtir hlawm a, duhsak tlakin hna an thawk niin ka hria," a ti.

Mizote chu pi leh pute aṭanga thil tiho thiam, hnatlanga thawk ṭhin an nih thu sawiin Lalduhoma chuan, "He kan thawhho thiamna kan thisena bet tlat tawh hi kan eizawnnaah kan hman thiam chuan kan hlawkpui ngei dawn. Livelihood Mission pawhin chu chu a tinzâwn a ni," a ti a; self help group-te chuan Mizoram economy-ah danglamna nasa tak thlen thei an nih thu a sawi.

Chief Minister chuan, CMTC chu mi tam takin eizawnna khawp thiamna an chharna hmun, SHG member-te intuaihriamna hmun leh mi dangte tan pawha chhawr theih a nih a beisei thu a sawi bawk.

RD minister Prof. Lalnilawma chuan, Community Managed Training Centre chu pawl enkawl tura din a nih thu sawiin, "Amah leh amah inenkawl thei tura ngaih a ni. SHG kaltlang hian hmachhawp lian tak tak kan nei a, kan ram siam/thar chhuah (product)-te hi brand pakhat hnuaia kalpui kan tum a, kum khata Rs 1,00,000 la lut pha lote puala hmalakna pawh kan kalpui dawn," a ti.

Minister C Lalsawivunga pawhin thu sawiin, Thenzawl leh a chhehvel khuaa mi, MzSRLM hmalakna hlawhtling taka an kalpuitute chu taima leh rinawm taka thawk zel turin a chah.

Vantawng CLF CMTC hi Mizorama a hmasa ber a ni a, kum hnih chhungin district tinah din tum a ni. Mi 60 lenna training hall, mi 10 aia tlem lo riah theihna dormitory/pindan, choka leh SHG member-te'n a ṭul anga an dawr tur CLF office a awm.

Vantawng CLF hnuaiah hian Bungtlang, Keiṭum, Hriangtlang, Thenzawl, Zote South, Buangpui, Neihloh leh Kanghmun South khuate a awm a ni.