KHAWTHLIR

Compartment exam neih hun

Mizoram Board of School Education chuan June 6, 2025 khian High School Leaving Certificate (Compartmental) Examination, 2025 a buatsaih dawn. Compartment exam neihna atan centre 11 ruat a ni.

MUHCS-a ziah luh man tumsak dawn

Lengteng bialtu MLA F Rodingliana, minister of state chuan nimin khan Lengteng huam chhunga HSLC 2025-a ti ṭhate lawmpuina Ngopa community hall-a buatsaih a hmanpui, Minister chuan, a bial chhunga harsa zawkte Mizoram Universal Health Care Scheme-ah an inziah luh theih nan a thla khat hlawh bakah, MLA fund aṭangin Rs 10,00,000 a pek tur thu a puang.

Minister-in sorkar  sikul a tlawh kual

Minister of state Lalnghinglova Hmar chuan May 6, 2025 aṭang khan a bial, Aizawl West-II chhunga sorkar sikulte a tlawh kual a; sikul hotute chu sikul, zirlai leh zirtirtute mamawh leh harsatnate a sawipui. Minister hian vawiinah sikul a tlawh zo ang. Nimina sikul a tlawh kualnaah Lalnghinglova Hmar chuan, mipuiin sorkar sikulah rinna an nghah theih nan ṭan rual a ṭul thu sawiin, "Sorkar sikula zirtirtute hi training nei leh thiam zawk an ni a, nu leh pa náwlpuiin an fate sorkar sikulah luhtir an duhna hmuna siam turin ṭhahnem kan ngaih lehzual a ngai," a ti a; sorkar sikulte chu mipui náwlpui ban phak leh mi harsa zawkte chhâwk zâwgkhaitu a nih thu  a sawi.

Contractor pawl  an lungawi lo

Mizoram Contractors Association (MCA) chuan nimin khan thuchhuah siamin, PWD Engineer in Chief-in contractor-te registration tinung (renew/revalidate) turte June 20, 2025 hmaa tinung ngei tura hriattirna a chhuah chu ṭha an ti lo a, an dem thu tarlangin, "Tun hma aṭang tawhin registration revalidate/renew-na atan pawisa vawi khatmah kan la chawi ngai lo a, tun hnaia pawisa chawi tura contractor-te tih kan ni hi kan lungawi lo hle. Mizoram sorkarin he kan harsatna hi min sutkiansak turin kan phût tlat a ni," an ti.