LADC CEM atan N Zangura lak luh a ni

Lai Autonomous District Council (LADC) chief executive member (CEM) atan nimin zing dar 6:30 khan M Kawnpui bialtu MDC N Zangura rinawmna thu tiamtira lak luh a ni a; term kal laia CEM pangana a ni.

LADC CEM lak luhna inkhawm hi LADC Hall-ah buatsaih niin, LADC executive secretary K Lalthanzara’n a kaihruai a, N Zangura chu Lawngtlai additional DC David Lalrinawma'n rinawmna thu a tiamtir. Lak luhnaah hian United Democratic Alliance-a tel MDC-te bakah, BJP hruaitute leh LADC official-te an tel.

LADC-a sorkar siam tur hian BJP leh MNF party MDC-te chuan United Democratic Alliance an din a, an hotu atan tun hnaia ZPM aṭanga BJP zawmtu N Zangura thlan a ni.

LADC-ah hian mipui thlan tlin MDC 25 an awm a, BJP hian MDC pahnih neiin, MNF-in MDC 11 an nei a, pawn lam aṭangin Congress MDC awm chhunin a thlâwp bawk. N Zangura lak luh hma chiaha sorkar siamtu ZPM chuan MDC 11 an nei.

LADC sorkar term 11-na kal laia MDC-te hi December 2020 inthlanpuia thlan tlinte an ni hlawm a; N Zangura hi sorkar term kal mekah CEM atana lak luh pangana a ni.

CEM thar N Zangura hian nimin zing khan CEM pisa a luah nghal a; CEM a ni chu Pathian remruat a nih thu a sawi. A kaihhruai sorkar din chhoh danah mi ṭhenkhatin felhlel a awm nia ngaitu an awm tih sawiin, "Dan dinglai palzûtna kan nei lo a, duhthlanna kan neih hmangin sorkar kan din a ni. Mimal hamṭhatna leh duhâm vanga sorkar din kan ni lo. Ṭhu chung ni loin, kal chhuakin theihtawp chhuahin hna ka thawk dawn a ni," a ti.

CEM ni lai V Zirsanga, ZPM chu May 7, Nilaini khan Governor-in a ṭhiat. District Council & Minority Affairs secretary Zodingpuii'n notification a chhuah danin, CEM atana V Zirsanga ruatna February 24, 2025-a tihchhuah chu ṭhiah a ni a; V Zirsanga hoa LADC budget 2025-26 pass tawh pawh ṭhiah a nih bakah, CEM atana ruat thar N Zangura tel loin LADC sorkar thil reng reng tih phal a ni lo.

LADC sorkar siam tawh lo a, inthlanpui buatsaih thuai phûtin Lai Students’ Association (LSA) chuan May 6, 2025 aṭangin LADC pisa leh Lawngtlai DC pisaa pisa kai turte an dang a, May 7-ah pawh an chhunzawm.

Lawngtlai aṭanga thu dawn danin, Lawngtlai District Magistrate chuan May 7, Nilaini zan khan Lawngtlai Council Veng leh New Vengpuiah punkhawm khapna thupek a tichhuak. LSA lamin an dan leh hmain, zing karah CEM atana N Zangura lak luh inkhawm chu buatsaih a ni ta a ni.