State pawn aṭanga artui lei nan kum tin cheng nuai 220 chuang kan sêng - CM

Chief minister Lalduhoma chuan nimin khan a bial chhung­ Thenzawlah Mega Egg Farm sakna tur lungphùm a phúm. CM chuan, kum tin state pawn aṭanga artui lei nan cheng nuai 220 chuang sên ṭhin a nih thu a sawi.

Mega Egg Farm hi NABARD RIDF sum cheng vbc. 20.64 sêngin Thenzawl AH&Vety Farm-ah din tura ruahman a ni a; arpui 1,00,000 awm thei tur niin, ni tin artui 75,000 vel thar thei tura duan a ni. CM hian Dilpuiah bailey bridge dawh tur lungphùm a phùm bakah, Mizo sial vulh punna hmun a hawng bawk.

Lalduhoma chuan, Mizoramin artui lei nan sum a sên nasat thu leh artuiah intodelh a ngaih thu a sawi a, "Mizo mipuite'n artui hi kan ei nasa a, mahse, kan thar chhuah ve loh avangin kum tin artui lei nan cheng nuai 220 chuang kan seng ṭhin. Kan mamawh zawng zawng thar theihna farm kan din thei lo a nih pawhin, eng emaw zat kan lo thar ve dan tur tal dap a ṭha," a ti.

Inkhawmah hian AH&Vety minister C Lalsawivunga leh minister of state Prof. Lalni-lawma te pawhin thu an sawi.

Sial vulh punna hmun hi Rashtriya Gokul Mission 2023-24 sum nuai 430 hmanga din a ni a, sial 100 vulh theihna tura ruahman niin, contractor chu Architecture Interior Engineering Construction a ni. Vety Farm chhung Dilpuiah NABARD sum nuai 83 hmangin lei pahnih dawh tum a ni bawk.